Manny Pacquiao Le Adrien Broner An I Thong Cang Lai

Manny Pacquiao nih ara laimi zerhteni ah hin Adrien Broner he Las Vegas khawpi ah an i thongh cang lai, Manny Pacquiao hi a upa in kum 40 a si cang nain kum hna cu nambar sawh sawh a si ko tiah a chim. Filipino boxer Manny Pacquiao nih cun weight pali bak ah World Champion a rak si cangmi sin ah WBA World Welterweight title a ken liomi cu ven khawh aa zuam lai i, kum sawmli a tlin hnu ah a vawi khatnak aa thonghnak ding a si pin ah boxing lei a luh hnu i professional fight vawi 70 a ngeihnak bak a si fawn.

Manny Pacquiao nih cun kum sawmli ka tlin hnu ah ka vawikhat i thonghnak ding a si caah, ka caah cun zuamnak thar a colh i, ka kum cu tam ko hmanh sehlaw ka taksa aa fit tuk rih caah kum hna cu nambar sawhsawh a si zia hi mipi hmuh ah langhter ka duh. Kum cu zei zat ava si zong ah sullam a ngei tuk lo, a biapi bikmi cu kaa timhtuahnak le faakpi kaa zuamnak hi a si ko tiah a ti.

Manny Pacquiao, Pacman nih hin boxing a luh kaa te ah cun an chungkhar khawsak zong ah an sifak ngai i, a nu nih an chungkhar a zohkhenh khawhnak ding ah vawikhat aa thongh ah hin $2 te hlawh in a rak i thongh tawn, a lung dong duh lo i, a pehzulh peng rih i, atu ahcun world champion tiang a hung si pin ah an ram ah senator (အထက်လွှတ်တော်အမတ်) tiang a si cang.

American boxer a simi Adrien Broner hi leng lei ah thawngpaang tampi a ngeimi a si i, a luan ciami december thla zong ah khan phung buarin motor a mongh caah tlaih a rak si, hi leng ah hin nawlngeitu hna he buaibainak a phun phun a rak ngei cangmi zong a si fawn, a min deu ah ‘The Problem’ ti in theihmi kum 29 upa Broner nih cun Manny Pacquiao le Floyd Mayweather hi an i thongh tthan lai timi thawngpaang a hung um tthan tik ah cu thawngpang a chuakmi a nennak kong cu a chim i, mi nih Mayweather kong lawnglawng an buaipi i, amah konglam an chim tlawm tukmi cu a rem lonak kong a chim.

Mi nih hin Manny Pacquiao le Mayweather i thongh tthan kho an sinak kong hi an chim peng i, a sinain Mayweather cu aa diin thai cang in ka theih, mipi hna nih hin hram hram in an ka hrelh peng in ka theih, ka konglam hi tthittha in an chim duh lo tiah a ti. Kan i thonghnak a hnu bik panga kha zoh hna ulaw, world champion a phun phun ah kaa langh cang i, i thonghnak in luat ding ah ka zaam bal lo, ka thongh dingmi hi cu zei weight category zong ah title zeizat an va lak cang zong ah zei ah ka rel hna lo tiah a ti.

A chim tthan rihmi ahcun Manny Pacquiao zong hi cuti ngai ngai sang cun ka chiah lem lo, amah nih hin a ka ttih ngaingai, kei hi fighter phundang ngai ka si i, hi lentecelhnak ah hin konglam ttha taktak ka rak chiah cang, kan i thongh tik ah ka tei cikcek lai i, cu hnu ah zu ka dinpi lai tiah a ti.

Releated Post