Ronaldo Le Messi Nih Goal Hnih Veve An Khumh Nain Teinak An Hmu Hlei Lo

Tulio vawlei cung bawlung chuihthiam hna lak ah minthang bik le mipi zong nih an uar bik hnami bawlung chuih thiam pahnih hna cu tulio Juventus club ah a ummi Cristiano Ronaldo le Barcelona club ah a ummi Lionel Messi hna hi an si ko. Zahan zaan an bawlung chuihnak belte ah an mah lei kap in cun an club ca ah goal hnih veve zong an khumh khawh ko nain teinak belte an hmu kho lo.

Juventus le Parma an chuihnak ah Juventus hmaikal le goal sut tu bak a si vemi Cristiano Ronaldo nih an club caah goal hnih bak a khumh lengah Daniele Rugani zong nih goal khat zong a beet chap rih ko nain an neihmi goal thum cu Parma lei in Antonino Barilla le Gervinho hna nih an cham khawh ve hna caah teinak hmu loin an i tluk diam ko.

Cu ve bantuk in Barcelona le Valencia an chuihnak ah Messi nih goal hnih bak a khumh ve ko nain Valencia lei in Kevin Gameiro le Daniel Parejo hna nih goal khat ve ve an khumh ve ruangah ah an nih zong an i tluk bak ve. Messi nih hin an chuihnak in minute 39 ah goal khat le minute 64 ah goal khat tiin goal hnih bak cu a khumh ko nain Barcelona lei in Kevin Gameiro nih minute 24 ah goal khat le Daniel Parejo nih minute 32 ah goal khat a khumh ve.

A sinain Juventus tu cu Barcelona nak in an van rak ttha deuh saumau ko, a ruang cu a tutan an chuihnak ah i tluk ko hna hmanh sehlaw a pahnihnak dirhmun in Napoli club cu mark 11 bak in an lonh cang hna. Barcelona belte nih cun puaikhat an chuih hnu ah a pahnihnak dirhmun in Atletico club cu mark ruk lawng in an lonh khawh ve hna.

Releated Post