Mittha Pa Nih A Hawi Mitcaw Pa Zanriah Ei A Sawmnak Kong

Hlan lio ah mi ttha pa pakhat nih hin mit khua hmu lo mitcaw hawikom pakhat a nei i a dawt tuk ruangah voikhat cu zanriah ei a sawm. Zanlei a hung phanh tik ah an kawifa cu nuam te le thaw tak tak in rawl cu an ei tti i rawl an ei dih ah cun khua zong a hung mui ngai ve cang. Cu tik ah mitcaw pa nih cun ka kawl khua zong a tlai cang caah ka lawi cang lai tiah a chimh.

Cu tik ah a hawi pa nih cun mitcaw a hawipa cu mei inn pakhat a pek, a hawi mitcaw pa cu a thin hung tuk i “mit khua hmu lo mitcaw ka si na theih ko bu ah mei inn na ka pek hi na ka nehsawh ruang le na ka zomhteih ruangah maw si” tiah zanriah ei a sawm tu a hawi pa cu a ti colh.

A hawi pa nih cun “ka kawi, kan nehsawh le kan zomhteih ruangah si loin kan dawt tuk ruangah mah mei inn kan peknak hi si, nang mah nih cun khua na hmu lo nain midang nih cun an rak hmuh khawh lai. Mui lak i na lawi tik ah nang nih midang cu na hmu hna lo nain midang nih nang mah an rak in pah sualnak hnga lo le an in hmuh khawhnak ding caah mah mei inn hi na caah a ttha” tiah a leh hnu lawng ah mitcaw pa nih a hawi pa dawtnak kong cu aa fiang.

Vawlei cung kan nun chungah zei tluk aa dawmi hawikom ttha zong hei si ko hmanh usilaw thil pakhat kan fian ning aa khah lo ah cun phundang lei in ruah a fawi ngai. A biana ah fanu dawh ngaimi pakhat hei nei law na fanu pasal ding nih phaisa tampi he rak kan hal hna seh ti cu na duh ko lai nain na fapa caah nupi na hal lai ah cun phaisa tlawm tein rak kan hal hna seh ti na duh ko lai.

Na fapa nupi cu nan inn chungkhar kar ah mah nu hi rian ttuan zong a fel lo tuk i theih thiamnak zong a nei lo tuk tiah na ruah sual ko lai nain nang mah fanu belte cu a pasal te chungkhat lak ah nawl a nei ngaimi siter na duh ngai fawn ko lai. Lam na kal tik ah na pawngah kalmi mawttaw khi na rem lem hna lai lo nain mawttaw na mawngh tik ah cun lam aa chokmi minung khi na rem lem hna lai lo.

Mi kut tang ah rian ttuan tu dirhmun in na um lio ah cun kan pu maw kan pi nih hin a kan hrem tuk tiah na ruah ko lai nain rian neitu mirum dirhmun na phanh tik ah rian ttuan zuam huaha lomi minung cu na huat ngai fawn ko lai. Thil cawtu dirhmun in na um lio ah cun an thil man faak tuk tiah na ruah tawn ko lai nain thil zuar tu na si ve tik ah cun thil cawtu nih an ka deet tuk tiah na zai kho men.

Cu ruangah zei thil kong hmanh ah hin kan mah lei kap lawng in ruat loin midang lei kap zong in ruah piak ah a ttha. Midang lei kap in na ruah lo i nang mah lei lawngin na ruah ah cun na caah buainak a chuak peng ko lai.

Releated Post