Kachin Ramkulh Chungah Kawl Ralkap A Tom Tom Bak In An Lut Tthan Hoi

Tulio kan kawlram dirhmun hi cu ruah lengmang tik ah a hlei in tlaangcung mi hna caah cun a buai chin thluahmah ko cang. Kan hnu kum 2018 chungah kawl cozah ralkap le Kachin ralkap KIA hna kar ah kah dohnak caan zei mawzat chung a chuah hnu ah a hung dai tthan. Kan mah he unau bak a simi Kachin ram chungah daihnak a hung chuah tthan tik ah kan hna a ngam ngai cio.

A si nain kan hnu lei January niriat ah a cangmi Rakhine ram palik sakhan pariat bak Arakan ralkap nih ruah lo piin a vun tthuat tthan tik ah Rakhine ram chungah cozah ralkap le Arakan ralkap hna kar ah kap hnih lei kah dohnak biatak tein a hung chuak tthan hoi. Rakhine ralkap le kawl cozah ralkap kar kah dohnak a chung linhsat lio te ah kap khat lei in KNU le kawl ralkap kar ah kah dohnak a hung chuak tthan ve hoi.

Rakhine ram chung ah cozah ralkap le AA kar kah dohnak biatak tein a hung chuah tthan tik ah hin kawl cozah ralkap lei kap zong nih tlangcung hriamtlai phu hna cungah zumh ngamnak an neihmi zong cu a hung zor thluahmah ve cang bantuk in tuni February ni sarih ah kawl ralkap phur tu mawttaw cei lak te Kachin ram ah an rak lut tthan.

Zei ruangah dah ralkap mah zat zat hi Kachin ram chungah an luh tthan timi kong he pehtlai in zei bantuk thawng thanhnak hmanh a um lo nain tthatnak lei kap cu a si lem lai lo dah. Kapkhat lei in ruah tik ah Arakan Army kan timi hna zong hi Kachin ralkap KIA hna traning peknak in a dirmi an si tik ah hin ruah len awk zong a hung um ngai ve cang.

Kapkhat lei ah rampi hruainak ah ruahnak petu Daw Aung San Su Kyi nih tlangcung mi hna sin kip ah kal in ton biaruahnak a neih lio ah cozah ralkap lei nih biatak tein tlangcung hriamtlai phu hna he kah dohnak an linhsat termi te hna nih hin zei bantuk theitlai ko khi dik a hei chuah te hnga.

Releated Post