Kawlram Thongtla Lak Ah Minung 40000 Tluk Hi Cu Rithai Si Ruangah A Tlami An Si

Vawlei cungah hin rithaisi ko nih hin maw minung hi a rak kan hrawh bik ko hnga, ram dang du chim loin kan kawlram chung hmunkip ah a ummi thongin chungah thong tlami hna hi an tuak tik ah an zapi te ah minung 70,000 tluk hrawng an si i mah hna chung in minung 40,000 tluk hna hi cu zei dang kong ah si loin tirhaisi zuar ruang le hman ruangah a tlami hna an si tiah cozah lei nih cun phung ning tein thawng an thanh.

Kum 2018 tiang ah khan kawlram chung thongin dih lak ah thong a tlami hna hi minung 76,931 tluk an rak si i mah hna chungin minung 39,301 hna hi rithaisi hman ruangah le chaw lehnak tuah ruangah thongthlakmi hna cu an si tiah Pyidaungsu cazin an tuah ning ah cun a lang.

Thongin kip ah thongtla mi hna dirhmun hlaitlainak kan tuahnak ah a tu bantuk in fiang te le tling tein kan theih khawhnak hi si i rithaisi case mah tluk a tammi hi mipi kan caah ttih a nung tukmi thil pakhat zong a si fawn tiah mipi phaisa cazin dothlatnak committee i vice president a simi U Aung Min nih cun a chim.

A tu bantuk in kan ram chungah lungthawhnak sitlang telh in rithaisi a dang dang hna hmannak le zuarnak hna hi a tam biknak hmun pawl cu Shan ramkulh, Kachin ramkulh le Rakhine ramkulh deuh hna hi an si i a dang dang hmun hna zongah a hmangmi le a zuarmi zong cu an um tthiam ve tiah rithaisi dohnak lei ah an mah le an ti khawh tawk in rian a ttuan tu mipi phu hna nih an chim ve.

Kan hnu lei te zongah khan Rakhine ramkulh Maung Daw myone chung ah Kyat ting 80,000 leng mang a simi sitlang cu tleih a si nain a nei tu belte an theih khawh rih lo lengah a tleih zong an tlai kho rih fawn lo. Kawlram in kan ram chungah lungthawh ternak sitlang hi a tom tom bak in a lut peng tiah Thailand, Malaysia le Bangladesh ram hna zong nih an chim ve fawn.

U Win Myint presedent rian a ttuan hnu cun rithaisi kong he pehtlai in thawngpaang a kan pe kho tu cu laksawng pek nan si lai timi a thanh hnu ah hin rithaisi kong he pehtlai in thawngpaang petu te te zong an um i a tleih zong cu an tleih len ve ko nain hi bantuk rian ttuannak ah a lu bik or a hram a simi minung pawl belte hi an tlai kho tuk lem hna lo.

Rithaisi hmannak ah a laar bikmi hmun hi Kachin ram chung Phakanh lungvar kawlnak hmun a si bantuk in cheukhat si nih a suai cangmi hna nih cun an fa le hna hmanh hi Kyat 300,000 te hna in a zuar tu zong an um ve tiah Phankanh khua ummi Daw Tin Aye nih cun a chim.

Cu ruangah kan ram chungah rithaisi ser tu, zuar tu le hmang tu an umnak hnga lo a tu lio hi biatak tein ttuanvo nei tu hna an cawlcangh cuahmah lio a si bantuk in sitlang si ah sechoh si ah na kut cung i tlawmpaal te an in tleih sual ah cun thongthlak bak na si ko lai.

 

 

 

 

Releated Post