Ronaldo Thlahlawh Cu Messi Thlahlawh Hnarcheu Zat Lawng Bak Si

Tulio vawlei cung bawlung chuih thiam minthang hna lak ah mipi nih an uar bik hnami Lionel Messi le Cristiano Ronaldo hna an thlahlawh aa dan ning zoh tik ah Ronaldo fan pawl caah cun ngaihchia ngai a si ko. A ruang cu Fox Sport Asia le Goal.com timi website hna nih hnu bik a thanh ning ah cun Ronaldo thlahlawh hi Messi thlahlawh hnarcheu tluk lawng bak si ko.

Fox Sport Asia le Goal.com hna nih hnu bik a thanh ning ah cun tulio vawlei cung bawlung chuih thiam hna lak ah thlahlawh sang bik a hmu tu cu Barcelona hmaikal Lionel Messi a si i thlakhat ah a hmuhmi hi € 8.3 million bak si i tulio Juventus club hmaikal a simi Cristiano Ronaldo nih thlakhat ah a hmuhmi hi € 4.7 million lawng bak si tik ah Messi thlahlawh hnarcheu tluk lawng si.

Spain La Liga i an rak um lio ah khan cun Barcelona club hmaikal Lionel Messi le Real Madrid hmaikal Cristiano Ronaldo hna hi pakhat le pakhat thlahlawh tam hmuh aa rak zuam tawnmi te an rak si nain a tu ah cun hnarcheu tluk bak in an hung i thlau ko cang. Messi le Ronaldo hna pahnih ah hin a ho set hi dah mipi nih an uar deuh timi kong zong ah an buai ngai fawn.

Vawlei cung bawlung chuihthiam hna lak ah a thiam bik veve ah ruah hnami minung pahnih kar ah a tu bantuk in thlahlawh kong he pehtlai in aa dan tukmi hi Barcelona club nih Messi an cawisannak a langhter ngai bantuk in kapkhat lei ah a mah nak hmanh in a thiam deuh tiah cheukhat nih ruahmi Ronaldo belte cu a hlaan a rak umnak Real Madrid nih a rak thlaak bak ko.

Tulio valwei cung bawlung chuih thiam vial te hna lak ah thlahlawh sang bik minung pahra hna an thlahlawh zat le min cazin cu Foe Sport Asia nih a langhter ning tein ka vun ttial ve hna lai. A pakhatnak ah cun  € 8.3 million hmu in Messi a dir i a pahnihnak ah cun € 4.7 million hmu in Ronaldo a dir ve.

Cun a pathumnak ah € Antoine Griezmann nih € 3.3 million, paliknak ah Neymar nih € 3.06 million, panganak ah Luis Suarez nih € 2.9 million, paruknak ah Gareth Bale nih € 2.5 million, Pasarihnak ah Philippe Coutinho nih € 2.3 million, pariatnak ah Alexis Sanchez nih € 2.28 million, pakuanak ah Kylian Mbappe nih € 1.73 million le pahranak ah Mesut Ozil nih € 1.6 million hna an si.

Source: https://www.foxsportsasia.com/football/1038679/reports-lionel-messi-earns-twice-as-much-as-cristiano-ronaldo-neymar-sanchez-ozil/

 

Releated Post