AA Nih Kawl Ralkap Sin Ah Ralrinnak An Pek Tthan Hna

Rakhine tam chaklei ah a chuakmi AA le kawl ralkap kar kah dohnak hi peh zul in a chuah peng ko rih ah cun Rakhine ram chung hman dang hna zong ah ral dohnak a karh chin thluah mah cang lai tiah Rakhine ralkap AA lei in Buhmochoh Ngeo Htun Aung nih a luan ciami February niruk ah khan social media cungah video bak in a thlah.

A tu bantuk in Bohmuchoh Ngeo Htun Aung nih bia a chimnak video a thlah hi Rakhine ram chaklei ah kawl cozah nih a ralkap a thlah chap tthan hna timi thawngpaang a chuah hnu khan si. Rakhine ram chung myone pasarih chung zongah AA ralkap kham khawhnak caah tiin kawl ralkap le palik hna nih khua chung inn kip ah luh ding le cheknak tuah ding tiangin NLD cozah ramkulh vuanci ah a chiahmi U Pu Ngyia zong nih nawl a pek hna.

Mah video hi Kachin ralkap (KIA) hna an khua lipi le an center a simi Laiza Kachin ralkap hrambunhnak sakhaan in Buhmuchoh Ngeo Htun Aung nih an mah Rakhine holh bak in a thlah mi si. Kawl ralkap hna nih hin Rakhine ramchung myone pa sarih i khua cheukhat hna chungha lut in le khuami hna inn chung tiangah an mah duh paoh in lut in cheknak an tuahnak ah hin khuami hna thil zong phung ning loin an chuh len ve hna.

A luan ciami January thla in February thla tiangah Rakhine ram chung AA le kawl ralkap kar kah dohnak ah hin kawl ralkap lei in minung 100 leng an thih cang ruangah le kawl ralkap lei nih Rakhine ralkap hna an duh ning in an thah khawh ve lo ruangah hin AA cung an thin hunnak cu zei hmanh sualnak nei lomi mipi cungah an bungh cang tiah Buhmuchoh Ngeo Htun Aung nih cun a chim fawn.

“Mah umnak inn le lo chuahtaak in a zaammi hna sin ah bia cah kan duhmi hna cu nan chungkhar ven himnak ding caah hin zaang fahnak tein nan inn lei ah kir tthan hraam ko uh timi hi si. Minung kan nunnak tluk in a biapi mi hi zei thil hmanh a um lo i chaw le va hna cu kan nun chung paoh kawl tthan khawh a si ruangah nan nunnak hi phaisa he cun thlen tim hraam hlah uh” tiah a chim chap rih fawn.

Rakhine minphun le Chin miphun minung 200 leng hna cu kan hnu lei zarh chungah khan Bangladesh ram Bandatan timi district chungah an khan an rak zaam hna ruangah an ram chungah a rak zaammi kawlram mi kong he pehtlai in biaruahnak nei dingin Bangladesh cozah nih kawlram ambassador zong a auh ve cang.

Releated Post