Caw Pathum An Rawl Ttaam Tuk Ruangah Dawr Chungah An Cian

Tuluk ram Hong Kong, Mui Wo timi khua ah a ummi ei din zuarnak dawr pakhat chungah an rawl ttamnak tuar kho ti lo in caw pathum an luh ruangah le an cianh ruangah thil caw tu mipi cheukhat hna cu awlok chong in an tuah dih ko hna. Mui Wo khua hi cinthlak lei rian ttuannak ah a minthang ngaimi khua pakhat a si i Lantua tikulh in nichuah lei kap ah a ummi si.

A luan ciami February ni sarih ah khan Mui Wo khua chung ei din zuarnak dawr pakhat chung ah caw pathum lut in dawr chungah an zuarmi tisik an hnah zong an ei piak dih hna, tisik anhnah lawng hmanh si loin an dawr chungah a ummi apple, piar le phaizawng tlai hna zong ngol hngal lo ti awk in an ei chap rih fawn.

A tu bantuk in cawi pathum an luhnak, ei din zuarnak dawr hi Hong Kong ah a ngan bikmi super market tang ah a ummi dawr (sai khuai) pakhat a si ve. Dawr hngak tu hna zong nih cun zei tuah ding thei loin an zoh sawh hna lio ko ah thil caw tu pakhat nih cun mah caw pathum cu banhla a pek len ve hna.

A si nain mah caw pathum hna cu dawr chungah caan tawi te chung lawng an lut i khim nawn in an ei hnu ah an chuak tthan ve. Dawr hngak tu hna nih saram zuatnak lei ah ttuanvo nei tu hna sin ah thawng thanhnak an tuah hnu ah an ei bang pawl cu thideng in an thian tthan ve.

Mah thil a cangmi hi a hmu tu cheukhat hna nih cun zoh a nuam ngai an ti lio ah cheukhat ve nih cun kan ram chungah saram hna caah rawl ttamnak hmun a tlawm tuk ruangah si tiah an ruahnak an chim ve hna. Dawr chungah lut in caw hna nih ei le din an ei lioak cu facebook cung a hung phanh tik ah ‘tukum hi caw kum cu a si lem rua lo’ minung pakhat nih comment a hun pek colh ve.

Cun a dang pakhat nih cun ‘mah caw pawl cu zaangfaak tuk te an si, an rawl ttaam tuk ruangah zei tuah ding thei loin le an tuar khawh ti lo caah an luhnak hi si ko lai’ tiah comment a pek bantuk in a dang pakhat nih cun ‘dawr hngak tu hna nih zei hmanh tuah loin einak nawl an pek hnami hmanh hi lawmhpi tlaak te si’  tiah comment a pek ve.

Video zohnak dingah mah ka zawn link te hi rak kan click piak ve: https://youtu.be/0jqFRjewmlU?t=4

 

 

Releated Post