Monu Lei Halmi Man A Pek Khawh Lo Caah Tthitumnak Puai Kal Loin Lodiam A Zaam

Thailang ram chung tthitumnak puai pakhat cu taza cuainak puai ah a cang diam ai, mah tthitumnak puai tuahnak ah hin mo nu lei nih an halmi man a pak khawh lo caah mo pa cu tthitumnak puai zongah kal duh loin a zaam ruangah mo nu nih taza a cuai colh ve. Mo nu lei chungkhar hna le inn pa hna nih cun tthitumnak puai a dih tiang zongah mo pa hi a rak chuak duh bak lo tiah an chim.

Kum 26 a simi Boonyang Sawatdee timi tlangval pa cu a mah he kumruk chung bak aa duhmi Arunee Jaengkrachang timi kum 24 a nungak nu he Thailand ram Kabin Buri district chungah a ummi Khao Din timi khua ah tthitumnak puai an tuah nain mah tthitumnak puai tuah ni ah cun mopa ding a simi Boonyang Sawatdee cu a rak chuak ti lo.

Boonyang timi mopa ding hi zei ruangah dah tthitumnak puai tuahnak ah a kal duh lo tiah cun tthitumnak puai an tuah lai nikhat aa duh ah hin monu lei chungkhar hna he tthitumnak puai tuahnak ding caah a dih dingmi phaisa le monu man kong te hna ceihmai nak an tuah. Mah an tuahnak ah monu chungkhar lei nih an fa nu caah pe dingin an halmi man a pek khawh lo caah tthitumnak puai tuahnak i a kal duh lonak cu si.

Mo pa a rak chuah duh lo caah mo nu chungkhar, inn pa hna le chungkhat rual chan vial te hna nih hnatlaaknak an tuah hnu ah tthitumnak puai cu an phiat ve tthan. Tthitumnak puai an phiat hlaan deuh ah hin mopa sin ah phone an chawnh tik ah mopa nih cun caan tlawmpaal tein rak ka hngak ta ko uh tiah a nawl hna bantuk in caan zei mawzat zong an hngah ve ko.

A si nain mopa cu a rak chuah duh hlei lo caah mo nu lei chungkhar hna zong an sawm hna mi mipi hmai ah an ning zahnak an tuar kho ve ti lo i tthitumnak puai tuahnak cu an phiat dih ve tthan, mah tthitumnak puai ah hin mopa lawng hmanh si loin a chungkhar hna zong pakhat hmanh an chuak duh lo tiah monu lei nih cun an chim.

Monu chungkhar lei nih an fanu caah an halmi man hi an mah Thaildang phaisa in Baht tinghnih le sui zei maw zat a si i cu man cu a pek khawh ve lo caah a kal duh lonak hi si tiah hnu deuh ah thawng an thanh. A nungak nu he kumruk chung bak aa duh vemi Boonyang timi pa zong nih an halmi cu pe kho dingin aa zuam len ko nain a pek khawh bak ve lo caah a zaamnak hi si.

 

Releated Post