Rian I Zuamnak Lawng Cun Rum Khawh Si Lo

Vawlei cung minung vialte hna hi a ho kan si hmanh ah rum na duh maw tiah mi pakhat khat nih biahalnak kan tuah hna sehlaw ka duh lo tiah bialehnak a tuah tu cu kan um hrim lai lo dah. Rum kan duh ruangah mi cheukhat hna cu midang nak in rian aa zuam deuh khunmi zong kan tampi, midang nih nikhat i suimilam pariat chung rian an ttuan lio ah rum a duh deuhmi hna nih cun suimilam 12 chung hna kan ttuan.

A si nain midang nak in kan rum khawh lo lengah kan i ruah ning bantuk in phaisa hna kan hmuh khawh lo tik ah kan lung hna a dong i cheukhat cu rian ttuan zuam ti loin kut dok dirhmun hna a phaanmi le mah le mah tiang aa thatmi zong an um ve. Mah hi zei ruangah ah dah si tiah cun rian ttuan zuamnak lawng hi rumnak a rak si hrim lo timi fiang tein kan theih lo ruangah ah si.

Voikhat cu tarpa pakhat nih lungrawk ngai in a tthu komi mino pa pakhat cu a hmuh tik ah “ka fa zei kong dah na ruah i zei ruangah dah mah tluk lungdong cun na tthut i khua na ruah ko” tiah a hal. Cu tuk ah mino pate nih cun “tu ni caan tiang ka rum khawh bal rih lo caah lungdong le lungrawk in ka tthu ko” tiah a leh.

Cu tik ah tarpa nih cun “ziah rum maw na duh ko” tiah mino pate cu a hal tthan tik ah “ka pu vawlei cungah hin rum a duh lomi minung kan um hnga maw” tiah a leh. Tarpa nih cun “a ttha rum na duh bantuk in a tu ah zei rian dah na ttuah” tiah a hal tthan, mino pate nih cun “company pakhat ah rian ka ttuan nak hi kum 10 leng si cang, midang nak in rian zong kaa zuam deuh ko nain a tu tiang cu ka rum kho hlei lo” tiah a leh tthan.

Cu tik ah tarpa nih cun “nang mah caah rian na ttuan si loin company caah pei rian na ttuan ko cu, mah ruangah rum ding a si ah cun na ttuannak company pei a rum ko lai cu, tak ah nikhat ah suimilam zeizat chung dah rian na ttuan i suimilam pakhat ah zeizat dah na hmuh” tiah a hal tthan.

“Suimilam pakhat ah hin 1500 ka hmuh i nikhat ah suimilam 10 chung ka ttuan’ tiah a leh ve, “suimilam pakhat ah 1500 in nikhat ah suimilam pahra chung na ttuan ah cun nikhat ah 15000 na hmuh va si kaw a tu ah hin nikhat ah 30000 hmuh khawhnak ding rian a um ti hna na ruat bal lo maw” tiah tarpa nih cun a chimh tthan.

Tar pa chim duhmi cu minung hi rian kan i zuamnak men men lawng cun rum khawh a rak si lo i kan ttuanmi rian hi zei bantuk rian dah a si timi ve a ho caah deuh ah dah kan ttuan, kan mah caah maw kan ttuan a si loah midang caah dah kan ttuan deuh timi hi fiang tein kan theih kan fian bak a hau, mah hnu lawng ah cun kan rum kho ve lai.

Releated Post