Sin Um Ma Phyo Phyo Mar A Hrem Tu Singapore Nuva Hna An Biachah Piak Si Cang

Kan ram sifah ruangah kawlram in siangapore ram ah sinum rian a ttuan tu kawlram nu pakhat a hrem tu hna nuva cu Siangpaore district biaceih zung lei nih an sualnak fian tein hmuh a si cang tiah tuni January ni 19 ah thawngthanhnak an tuah. A mah belte zei tik ah dah hi hna nuva cu biaceihzung lei nih biachahnak an tuah hna lai timi belte fiang in theih a si rih lo.

An sin ah sinum rian a ttuanmi Ma Phyo Phyo Mar cu a mah te bak in tisa in an toihternak case telh in a dang sualnak case pa nga lengah in ttuang hnawhnak ah hmanmi, chemical sihaang aa telmi bak an din ter ruangah kum 39 a simi Linda Seah cu a sualnak hmuh a si bantuk in a pasal Lim Toon Leng timi kum 44 pa zong nih a velh chap rih ruangah a sualnak hmuh an si.

Linda Seah le Lim Toon Leng hna nuva hi biaceih zung nih bia an hal hna lio ah inn nei tunu nih hin nang mah tein tisa in i toih tiah voihnih bak a ka fial tiah Ma Phyo Phyo Mar nih cun a chim. Tisa in an toih ter ruangah a tlungmi a hma zong cu si inn ah zohter loin a zummi tthim in an ka sawh ter tih tiah Ma Phyo Phyo Mar nih cun a chim chap fawn.

Mah lawng hmanh si loin inn ttuang hnawhnak sihang dinternak, ttuang ah a lu suk chihnak, a sam tlong dih tiangin a sam in hnuhnak le mobile phone in a tu le tu tuknak te hna zong Linda Seah nih a tuah rih fawn. Cun Linda Seah a pasal Lim Toon Leng zong nih Ma Phyo Phyo Mar cu voihnih kheng te bak a hmai ah a thongh rih fawn.

 

Linda le Lim Toon Leng hna hi mi hmuhnak ah cun a ttha ngaimi an i lawh ter nain an sualnak vialte cu biaceih tu pa nih a sining tein a theih dih cang. Orchard Road lamkam ah Anew Me Beaty Aesthetic timi dawr ah manager a simi Linda nih hin Ma Phyo Phyo Mar cu a dawr i aa kalpi nak ah a tuahto ning cu rian ttuan tu pakhat nih a hmuhnak in palik sin ah thawngthanhnak a tuahnak in hi kong hi an theihmi si.

A luan ciami kum 2016 October thla ni 15 lio ah khan Linda te nupa umnak inn cu palik pawl nih an chek dih hnu ah Ma Phyo Phyo Mar zong cu Khoo Teck Puat timi sizung ah an kal pi i cu ka sizung ah cun niruk chung bak an thlopbol ve. Cun a luan ciami kum 2016 February thla in October thla tiang a rian ttuan man zong an pek duh lo caah mipi lei a dirkamh tu department bawmhnak in a tlai bik November thla ah a rian ttuan man pek dih dingin sihni lei nih an chim. Kum pi kumhnih chung leng hi hna nuva cu bia an ceih hna hnu ah an sualnak zong fiang tein hmuh a si cang bantuk in February ni 11 ah biachahnak tuah piak ding in ni le caan khuah piak an rak si.

Cu ti cun nizan February ni 11 ah khan Ma Phyo Phyo Mar hrem tu singapore nu Linda Seah cu Singapore biaceih zung nih kumthum thong thlaak dingin biachahnak an tuah piak lengah Dollar 6600 bak daan an tat chap rih. Cun Linda Leah pasal Lim Toon Leng kum 44 zong biaceih zung lei nih cun zarhruk (6 weeks) chung thong tla dingin biachah piak ve a si.

An sin um nu nih a ttuanman thlahlawh an pek duh lo lengah ti le rawl zong ttha tein an pek duh lo ruangah a tu bantuk in thong tla ding tiangin biachahnak kan tuahmi hi si tiah biachahnak tuah tu biaceih bawi Olivia Low nih a chim. Linda Seah hi Ma Phyo Phyo Mar cung a thil tuahmi ruangah sualnak paruk bak in taza an cuaimi si.

Ref: Business Standard

 

 

Releated Post