Hringtu Nu Le Pa Nih Hlonhmi Dirhmun In Pangpaar Zuar Bu Tein Inn Pakhat Le Mawttaw Tiang A Nei Ve Cang

Vawlei cung kan nun chungah hrinmi fa le hna caah a faak bikmi le tuar a har bikmi thil pakhat cu a kan hringru nu le pa hna lila nih duh cawm duh loin hlonh a tongmi fa le dirhmun phanh hi a si ko lai. Cawm le ken an zuam lo hraat ah cun hringtu nu paw chung aa sem ka te zongah hei thah men ding si ko, a si lo le nau neih khawh lonak si hna zong hman ding si ko.

A si nain thlakua chung bak te pawi hnu i har le sa tak in hrinmi mah le fa le rori duh tthan loin lamkam hna ah hlonh a tongmi fale dirhmun hi cu a tongmi hna caah cun a rak faak hringhran ko lai. Ko Kaung Myat timi pa hi a hngakchiat lio ah a mah a hring tu nu le pa hna bak nih an rak hlonhmi fa a si.

Zei ruangah dah an rak hlonh tiah cun Ko Kaung Myat kumhnih a si lio ah hin a mah hringtu nu le pa hna an rak i tthen i a ho hmanh nih zoh khenh le cawm an zuam ve ve lo caah phungki siangin pawng ah an rak hlonh. An hlonhnak pawngah a ummi phungki siangin ah a tthumi phungki pa nih cun a zoh khawh lo ruang le a zaang fah tuk ruangah a mah nih aa zoh khenh.

Cu ti cun Ko Kaung Myat cu phungki siangin ah a hung tthang ve i tlangval pakhat dirhmun a hung phanh tik ah pangpaar zuar nak in pawcawm hram aa thok ve. Yangon khua chungah hin pangpaar zuar tu an tam pi ko nain Ko Kaung Myat cu pangpaar zuar tu midang bantuk in phanat zong aa denh lo lengah nikhat ah rawl voikhat te lawng bak a ei.

Mah rawl voikhat a eimi zong cu a khim lo deuh caan hna a um tik ah ka khim sual lai lo ti phaang in ti hrai thum peng a din chih ve. Pangpaar a zuarnak in hin nikhat ah Kyat 7000 a hmuh si ah cun thongkhat hmang in a taangmi 6000 cu aa khon peng ve. Ko Kaung Myat nih a lung chung te ah aa seh chih pengmi cu zei dang si loin phaisa hi tam piin kawl i tlawmte hman timi hi si.

A rian ttuannak ah aa zuamnak thawngin le phaisa semrel tein a hmannak thawng in a tu ah cun Ko Kaung Myat nih hin inn pakhat aa neih cang lengah mawttaw pakhat le inn hmun pakhat zong aa neih chap ve cang. A rak hlonh tu a nu le pa zong cu a ngai tuk ve ko hna nain mah a ngaih hnanak cu a philh khawhnak ding ah rian ttuan aa zuam chih peng ve.

Video zohnak: https://youtu.be/q7-K2UaGsho

 

Releated Post