U Kyi Lin Le Aung Win Zaw Hna A Tlawm Bik Kum (5) Hnu Lawngah Thah Khawh Si Te Lai

Kan theih cio bantuk in a luan ciami kum 2017 January thla lio ah tulio kawlram cozah hruai tu National League of Democracy party hna upadi lei ruahnak pe tu U Ko Ni cu a khual tlawnnak in a rak tlun lei Yangon International Airport ah U Kyi Lin nih hmuah chih bak in meithal in thi lak a rak kap.

U Ko Ni thahnak le thihnak kong he pehtlai in sulh hlatnak an tuah tik ah mi that tu hi U Kyi Lin lawng si loin mah kong ah pehtlaihnak a nei ve tu a dang minung pathum zong an tlaih chih hna. Kum pi kumhnih chung bak an bia an ceih hna hnu ah nizaan February ni15, 2019 ah biachahnak an tuah piak hna i U Kyi Lin cu thihdaan le kum 20 thong tla dingin bia an chah piak.

Cun U Ko Ni thah a fial tu Aung Win Zaw zong a thih hlan lo hri thlai dingin bia chahnak an tuah piak bantuk in a dang minung pahnih hna a simi Aung Win Htun le Zayar Phyo hna cu kum nga le kum thum thong tla dingin biachahnak an tuah piak ve hna.

U Kyi Lin le Aung Ko Win thihdaan peknak kong he pehtlai in mipi lei in bia a chuah ruangah kawlram upadi nih thih daan a pek ning le zei tik ah dah thah an si te lai timi kong he pehtlai in 7Days TV Media nih thongbawi le upadi lei ruahnak petu a simi U Khin Maung Myint sin ah biahalnak an tuah ve i a tang lei bantuk hin U Khin Maung Myint nih cun a chim.

“An sualnak a fian ko caah biaceih zung nih upadi ning tein biachahnak an tuah hnami si ko, a si nain azukhan luhnak a onh ve hna. Thihdaan pek kan timi ah hin a phun phun in um ve i an nih pahnih an pek hna ning hi cu thih hlaan lo (till death) timi si. A si nain cheukhat nih kan ruah ning ah cun a tu ah thihdan an pek hna i thong in chungah thah colh dingin kan rak ruah nain a rak si hrim lo.”

“Kyi Lin kong he pehtlai in kan chim si ah cun a nih hi thihdaan cu pek a si ko nain direct in thah khawh si lo, zei caah tiah azukhan luh khawhnak nawl an pek ve caah si. Azukhan luhnak nawl an pekmi ni sarih chungah hin Yangon ramtthen biaceih zungah a lut kho, Yangon ramtthen biaceih zung nih azukhan a luhmi an hnin ah maw a si lo le biachah ciami kan pom ko an ti si ah cun pyidawngsu (union) timi ah a lut kho rih fawn.”

“A si nain pyidawngsu ttaza hluttaw zong nih azukhan an hnon piah ah maw a si lo ah tanglei biachahnak hi an pom ve ko ah cun upadi lei in cun a dih ko cang i mah cu meithi biachahnak tiah kan auh mi si. Mah hnu zongah cun rampi uktu president sin ah zaangfah nawlnak caan a nei rih i president lei tu in cun Kyi Lin nih sualnak a neih le neih lo le upadi kong he aa pehtlai ti lo.”

“Rampi uk tu president nih a zaang fah i a luat ter si ah maw a tthumh piak deuh ah cun a mah vantthat si ko, a mah belte president sin in cu ka pom, pom lo ti um ti lo i Yes or No lawng si cang ve. Cu ruangah thihdaan pekmi misual pakhat nih biachahnak an tuah piak ni in president sin tiang a kal caan hi a tlawm bik kum nga in kum sarih chung tiang a rau kho ve.”

“A mah belte president nih a cohlan piak lo i No a pek si hnu cun bia an rak chah piaknak biaceih zung le a dang dang hna zongah cabawm a senmi in ca a rak phan te lai i mah hnu lawngah cun thah khawh si, mah cawbawm cu hri thlai dingmi hna le cabawm sen pahnih tiah auhmi a si”  tiah U Khin Maung Myint nih cun a chim.

Video zohnak: https://www.facebook.com/7daynews/videos/2308535069403688/?t=1

 

 

Releated Post