Russia Nih Hmunung Bik Hriamnaam A Sermi A Vun Pholangh Tthan

Tulio vawlei cung ram vialte hna nih ralkap le hriamnaam lei ah an ttih bikmi ram pakhat cu Russia hi si, ramdang hna cu chim lo vawlei cung ram vialte hna nih kan pa bantuk ah kan i zohmi American pi hmanh nih Russia hi zei dang ah cun si loin ral tuknak hriamnaam lei ah cun a ttih ziar ngai ve ko.

Zei ruangah dah mah tluk in an ttih tiah cun Russia nih hin ram tampi hna nih an neih khawh lomi ral tuknak hriamnaam ttha ttha aa neih hna lengah a nih hi phaisa nak in Sui bak aa khon rih fawn i hriamnaam ser thiam tu Engineer hna zong mifim tam tuk aa neih hna ruangah si.

Tutan zongah Russia ram hriamnaam lei ser thiam tu Engineer hna nih an ral nih an neihmi Saterllite tiang hman tla lak in a kap kho tu laser weapon timi an ser khawh tthan cang. Mah Satellite a kah kho tu hriamnaam thar hi Beriev A-60 laser laboratory aircraft timi vanlawng bawmh chanhnak thawngin an ser khawhmi si.

Mah hriamnaam nih hin zei bantuk thil dah a tuah khawh timi kong he pehtlai in fiang tein in cun an chim duh ve bak lo i satellite kap kho tu hriamnaam ti lawng in an chim sawh men i a sining tak le a rian ttuan khawh ning tak cu an thuh diam. A-60 laser laboratory hriamnaam hna hi Soviet Union chan lio ah ralkap hna nih thilri le ralkap cheknak ah an rak hmanmi llyushin IL-76MD Airlifter hna bantuk in an sermi si.

Mah satellite hrawk kho tu hriamnaam sernak hi NPO Almaz company he fonh in Voronezh-based Chemical Automatics Design Bureau le Beriev Aircraft company hna he fonh in an sermi hna si. Mah hriamnaam hna hi zei tluk in dah a tthat timi le zei bantuk thil ti khawhnak dah a neih timi cu vawlei cung rampi nih a thli tein an ngiat ziar ko.

 

Releated Post