Myitsone Project Kong He Pehtlai In Daw Aung San Su Kyi A Holh Tak Tak Cang

Tulio kan kawlram Kachin ramkulh chungah Kachin mipi hna nih an buai pi bikmi thil pakhat a um i mah cu zei dang thil si loin Tuluk nih Myitsone tiva phit in electric laak a timhnak project kong hi si. Myitsone kan timi hi a thei ciami zong kan um ko lai nain a thei rih lomi hna kan um sual ah a chuah kehnak kong zong tlawmpaal tein ka vun ttial chih lai.

Kachin ramkulh chungah hin tiva te tampi an um hna i mah tiva te hna lak ah Maykha le Malikha timi tiva te pahnih an um ve hna. Mah tiva te pahnih cu an luang i an va ton hnu ah a tu kan kawlram tiva vialte lak ah a ngan bikmi Irrawaddy timi tiva pi ah a va cang. Cu ka Maykha le Malikha tiva aa tonnak hmun cu Myitsone tiah auhmi si i cu ka hmun bak ah cun Tuluk nih electric dat laak nak ding caah dam tuah an timh ve.

Tuluk nih hin a saw sawh in cun tuah a tim ve lo i Ralkap uknak chan lio ah khan kawlram ralkap cozah nih Tuluk sin a rak zuar hnu ah ram hnih hnatlaaknak he tuah a timhmi hi si. Mah cu Thein Sein cozah a hung kai tik ah kan kawlram cu democracy lei lam panh in hruai a timh caah ralkap cozah nih Tuluk sin ah an rak zuarmi Myintsone project cu peh zulhnak nawl pi ti hna lo in an phih ter hna.

A si nain NLD party an hung kainak in caan zei mawzat a hung rauh hnu ah mah Myintsone project cu Tuluk nih pehzulh a timh tthan. Tuluk nih hin mah myintsone simaanking hi pehzulh a timh tthan lengah KIA hmanh NCA ah kah daihnak minsen thu ding in ka fial hna lai ti tiang in aa tler hro ve cang.

Hi kong he pehtlai in Kachin mipi hna nih a luan ciami kum zei mawzat lio ah an duh lonak zong voi tampi an rak langhter cang bantuk in a tu zongah an duh lo ti cu chim hau loin a fiangmi si ko. Cu raungah rampi hruainak lei ah ruahnak pe tu a simi Daw Aung San Su Kyi zong a um kho ti ve lo i kan hnu lei March ni hleikhat ni i Pyi khua ah tuahmi mipi he ton biaruahnak i bia halnak a tuahnak ah a tang lei bantuk in a leh hna.

“Myitsone simaanking kong he peh tlai in mipi lei zong nih thuk deuh le faak deuh cun kan ruah a hau ko, hi kong hi cozah lei nih rampi sipuaizi, luhmuhzim ramkhel lei le pawngkam zohkhenhnak timi thil pali zoh bu tein hmailei ram tthatnak ding caah kan tuahmi si.”

“Cu ruangah cozah nih ttuanvo kan neihnak i thei bu tein biachahnak kan tuah lai i mah biacahnak kan tuahmi zong cu zei ruangah dah kan tuah timi kong zong mipi sin ah fian ternak kan tuah te ko lai” tiah Daw Aung San Su Kyi chimmi cu si. Myitsone simaanking kong hi ralkap uk lio chan ah Tuluk cozah he kaphnih hnatlaaknak rak tuah cangmi a si nain Kachin mipi hna nih an duh lo caah Thein Sein cozah chan in tuni caan tiang an ngolnak hi si.

Releated Post