Apiaka Mintami Dirhmun In Man Faak Bik Dirhmun A Phan Tu Shu Qi

Tulio Tuluk ram mintami hna lak ah hlaan man faah bik dirhmun ah a ummi mintami Shu Qi hi tu lio Tuluk mintami hna lak ah cun man faak bik si ko hmanh sehlaw a tu bantuk dirhmun a rak phanh hlaan ah hin zei bantuk dirhmun in dah khua a rak sak i zei tluk harsat nak dah a rak ton timi kong rel tik ah khuaruah har ngai cu si ve ko. Minih hngarmi le dirhmun, hlawh tlinnak le rumnak dirhmun a phanh khawhnak ding caah harsa tak tak in aa rak zuam ve.

Shu Qi hi a luan ciami kum 1976 April ni 16 ah Taipei County, Xindian timi khua ah a rak chuakmi si i a hngakchiat lio ah cun Lin Lihui tiah an rak auh. Mi harsa chungkhar ah a chuakmi si bantuk in kapkhat lei in a chungkhar zohkhenh a duh ve caah high school a kai lio ah siangin kai ngol in sexy model rian ttuan hram aa rak thok, kum 13 a rak si lio ah an rak har tuk hringhran i hringtu a nu nih a neih chunmi hlawn thilri tiang an rak zuar.

Cu bantuk dirhmun nih zei bantuk tthat hnemnak dah a pek tiah cun midang bawmh chanhnak laa duh lo le a ho hmanh bochan duhnak lung thin nei lo in mah le kut ke te cung bak i dir ngamnak, ral tthatnak a rak pek ve. Hringtu a nu le pa hna hi hlaan lio phung le phai a zul tukmi an si caah Shu Qi zong cu a tu le tu ti awk in sik le huat aa rak huah ve caah kum 16 a tlin ah a nu sinak tang ah um zuam ti loin an inn bak in a rak chuak ve.

Cu ti cun umnak nei hua ha loin thlaruk chung a vah vaih hnu ah nu le pa dawtnak timi aa fiang tthan i a nu le pa umnak inn lei panh in a rak kir tthan. Kum 18 a hung tlin ah a nu nih cun vanlawng mawngtu pilot pa he i nei ding in khua a rak khan piak nain Shu Qi nih a duh lo. A hngakchiat lio tein upa puitling pakhat bantuk in thil hruk a uar caah agency pakhat sawmnak tong in midang nuamh ternak rian ttuannak ah a rak lut.

Kum 19 a hung tlin hnu ah cun Tuluk ram magazine cheukhat cover hna ah a hmaanthlak pawl langh hram aa hun thok ve, a si nain a hmaanthlaak pawl hi taklawng hmaanthlak le sexy hmaanthlaak lei deuh lawng te si ve. Mah lio caan i tak lawng in hmaan naa rak thlaak lio ah khan zei tin dah na um tiah biahalnak an tuahmi ah “mah lio caan ah hin zei hmanh thiammi ka rak nei rih lo i rian a ka petu agency hna fial ning paoh in ka rak tuah ve ko” tiah a leh hna.

Kum 20 a hung tlin hnu a luan ciami kum 1996 lio khan zuksin video zeihnak lei ah aa hung tel kho ve cang i midang mintami hna bantuk in a yan mintami dirhmun si loin mitami tak tak dirhmun bak in lem can hram aa thok. A si nain a nih lem a cannak hi cu kum 18 a tling cangmi hna lawng nih zoh khawh dingmi video pawl deuh an si, kum 1995 lio ah khan Penthouse Hong Kong magazine cover le Tuluk chuahmi Playboy timi magazine cover hna ah an rak langh ter i mah hnu cun Manfred Wong timi Hong Kong producer pa nih pehtlaihnak a rak tuah.

Mah hnu in sun Sex & Zen II le Red Light District timi vieo hna ah lem a hung cang tthan, cun kum 1996 lio ah Viva Erotica timi video i lem a can hnu ah 16th Hong Kong Film Awards timi ah laksawng pahnih bak a rak hmuh hna i cu caan thok in cun minthang zuksin video zatka hna ah lem cang in 18+ mintami timi min cu a rak hloh khawh.

Shu Qi hi kan kawlram mipi nih theih hram kan thoknak cu ‘So Close’ timi zuksin video in si i a luan ciami kum 2008 lio ah khan hmur lei ah vawlei cung sexy bik hmur nrei tu nu tiah mipi nih min an rak bunh. Model le hlasak thiam a si vemi Leon Lai timi pa he Bishonen timi zuksin an i zeih nak in an rak i duh beh nain kum sarih an i duh hnu ah an rak i tthen tthan.

Cu ti cun mi zei bantuk director le minthang hna he zong minchiat nak a nei ti bak lo i a luan ciami kum 2016 lio ah khan a mah he kumli chung bak aa duhmi director le minta a simi Stephen Fung timi pa he an hun i nei i a tu ah cun Shu Qi zong kum 43 a tlin ve cang bantuk in Tuluk ram mintami hna lak ah hlawh sang bik mintami dirhmun zong a hung phan.

Releated Post