Hngakchia Pa Te Thlarau Nih A That Tu Pa A Phuan Diam

Thailand ram nitlaak lei Prachuap Khiri Khan timi ah ram tupi chung thingkung cungah a kaimi hngakchia pa te cu ram vai pa nih va ah a ruah sual i thi lak in a kah. A tu bantuk in kah a tong tu hngakchia pa te hi kumkua te lawng a si rih i a kap tu pa nih hngakchia pa te ruak cu hlonh a timh.

Hngakchia pa te a kap tu ram vai pa hi a min ah Pramook tiah auhmi si i a nih hi ram lak ah vaak in Va le a dang dang kah duh in tupi chungah a vak tawnmi si. Mah ti a vah lio ah cun a cawlmi thingkung pakhat cu duh sah tein a fuh panh hnu ah Va bak ah ruat in a kah.

Mah a kahmi hngakchia pa te cu thingkung cung a tlaak hnu vawlei a phanh le caang ka bak in a thi colh, ram vai pa Pramook nih cun ho hmanh nih an ka hmu lem lo tiin hngakchia pa te ruak cu hlonh le thuh a timh diam ko. Hngakchia pa te ruak cu tupi chung a hlawnh hnu ah a mah tu cu a hlaan a rak ttuan tawnmi Icream a zuar tthan.

Zanlei khua a hung muih i hngakchia pa te inn lei a rak lawi ti lo tik ah hring tu nu le pa hna nih hngakchia pa te cu an kawl len ve. Mah hngakchia pa te hi a min ah Chalermchai Jopratha tiah auhmi a si i palik pawl nih an kawl len ko nain an hmu kho lo. A si nain zankhat cu Jopratha nih thlarau nih an chungkhar mi pakhat mang ah a ruak umnak hmun a chimh.

Mah an chungkhar mi nih a mangah Jopratha nih a chimhmi thil cu palik pawl sin a chim ve hna hnu ah an va kawl i Jopratha ruak cu an hmuh. Hngakchia pa te ruak cu ttha tein chek hlatnak an tuah tik ah a pa thilri tang ah meithal kuan a taangmi an hmuh. Mah meithal kuan cu an chek tthan tik ah ram vai hna nih sakah nak ah an hman tawnmi meithal kuan a si zong an theih chap fawn.

Cun mah bantuk meithal kuan hi Pramook timi ramvai pa lawng a hmang tawn tu si zong an theih tthan hnu ah ramvai pa Pramook cu palik pawl nih an tlaih colh ve. Hngakchia thi lak in a kah sual lengah a ruak tiang hmanh a hlonh tu ramvai pa Pramook cu thil sining a fian hnu ah kum caan zei mawzat cu thonginn ah caan a hmang ve lai.

Ref: The Bangkok Post

Releated Post