An Khua Pawng Hlei Donhnak Caah Nu Pawl Nih Kyat Ting 300 Man Bak An Sam An Zuar

Kan kawlram cozah hi a ttha kan ti hnga maw a ttha lo kan hei ti hnga dah, ramdang ah cun khua pakhat nih a herhmi cu cozah lei nih tuah piak a si tawn nain kan nih kawlram khuate cheukhat hna ah cun cozah bawmhnak tel loin mah kut ke le thazaang bak chuah in an khua lam aa cawhmi le an khua pawng hlei aa donhmi khua an tam ngai, mah bantuk thil hi kan ram cozah pi nih tah thei lo in khin maw a hei um ko hnga dik.

Mandalay ramtthen Onedwin myone Sintekwait khuami hna nih an khua pawng ah a ummi tiva hlei donhnak ding caah an khua um nu (nungak he nutung he) pawl nih an sam tan in an zuar hna. An khua pawng tiva hlei donh ding ah khuami nu pawl nih an sam tan in an zuarmi cu Kyat ting 300 man bak a si tiah mah ka khua ah Buddhist biaknak lei rian ttuan tu phungki pa nih a chim.

“Mah hlei kan donhnak ah hin khuami nungak le nutung hna nih an lu cung sam bak tan in an zuar i mah an sam man cu Kyat ting 300 leng bak kan hmuh. Mah kan hmuhmi phaisa te cun hlei donhnak rian ttuan cu kan domh i a tu ah a cian cu kan dih ko cang, cun mah hlei kan donhnak ah hin cozah lei tel pinak tel lo in an mah khuami hna nih chawva le thazaang an chuah i phaisa dihmi dihlak hi a zapi te ah Kyat ting 2260 a si” tiah mah phungki pa nih cun a chim chap.

 

Mah hlei donhnak ding caah hin khuabawi in khuami pumpaak hna tiang nih phaisa kan thawh cio ve hna i nu pawl nih an sam tan in an hlutmi hi cuai 70 tluk bak si tiah khuabawi pa U Kyi Khine nih a chim ve. Mah hlei an donhmi hi a sau ah pe 180 le a kauh ah pe 12 tluk bak a si ve i mawttaw kalnak ding le minung kalnak ding zong a dang tein an tuah ve hna.

Releated Post