Thai Titoih Puai Nikhat Nak Ah Minung (46) Bak An Thi

Thailand ram zong nih sunglawi tak in an tuah vemi Songkran an timi puai pi cu nizan April ni 11 khan tuah hram an thok ve i mah puai hi ni sarih chung bak tuahmi puai a si bantuk in ttih zong a nung kho tak tak ve. Mah Songkran timi titoih puai hi ni sarih chung hmang dingin Thai cozah zong nih zung khar in caan a pekmi hna si a nikhat ni ah hin minung 46 tiang thihnak accident a chuak manh.

Cun a luan ciami April ni 12 le ni 13 ni zongah khan, nihnih chung bak ah mawttaw accident nak voi 969 a chuah bantuk in minung 105 bak an thi, cun minung 1001 hna nih hliamhma an tuar i cheukhat cu sizung ah an zohkhenh hna lio a si tiah Transport Minister Arkhom Termpittayapaisit nih a chim.

Minung mah vialte thih lohnak le hliamhma tuarnak a chuahnak ah hin 34.6% hi cu zurit bu in mawttaw an mawnghnak ruanah si i 26.9% hi cu motorcycle rang tuk in an mawngh ruangah a chuak vemi si, cun 65.4% hi cu lam cungah a chuakmi si tiah Arkhom Termpittayapaisit nih cun a chim chap.

Cun committee hna nih an chim ning ah cun mah accident chuahnak ah hin 29% hi cu zanlei suimilam pali in pariat kar ah si i 25% tluk hi cu kum 50 luan minung hna nih ruah lo piin a cangmi thil an ton ruangah a thimi an si tiah an chim. A tu bantuk thil ttih nung a chuakmi ruangah ralkap, palik le local official hna tel in minung 65000 tluk bak lampi kip ah duty dingin an chiah chap tthan colh ve hna.

Cu ruangah minung 163000 nak tlawm lo hna cu traffic law zulh lo ruangah dantat aa huahmi an um i minung minung 45000 hna zong motorcycle luchin chinh lo ruangah dantat an si lengah minung 41000 hna zong motor le motorcycle mawnghnak licence an neih lo ruangah dan an tat ve cang hna.

Source: Thai PBS

Releated Post