Somalia IS Hruai Tu Pakhat An Thah Khawh Tthan Cang

Somalia ah Islamic State (IS) hruai tu hna lak ah a pahnihnak hruai tu a simi pa cu kan thah khawh cang tiah Somalia regoinal minister nih VOA thawngzamh phu sin ah a chim. Nizan April ni 14 (Sunday) ah khan Hol Anod le Hiriro timi kar ah a ummi IS raalhraang hna cu vanlawng bak in an tthuat hna nak ah Dhoqob tiah theihmi Abdihakim Mohamed Ibrahim a thih hi si tiah security minister of Puntland a simi Abdisamad Mohamed Gallan nih a chim (an min aa khat deng).

Khualtlawn aa timtu Dhoqob (Abdihakim Mohamed Ibrahim) le a hnu zul tu a hawi pa pakhat nih an i citmi mawttaw cu ral tuknak vanlawng bak in an phomh ciammaam hna i an zapi tein an thih dih caah mah a thimi hna lak ah hin IS hruai tu lutlai pahnihnak a simi Abdihakim Mohamed Ibrahim zong aa tel ve tiah Gallan nih cun a chim chap.

Ral tuknak vanlawng nih a kah ruangah an i citmi mawttaw hi mei a kang dih ve i mawttaw cung ah a cuang tu Dhoqob le a hawi pa cu an thi, a si nain Dhoqob a thi ti cu an thanh dih cang ko nain a thimi a hawipa hi ho set dah a si timi belte cu fiang tein an thanh kho ve rih lo.

Somalia ram chungah a hraangmi IS ralhraang phu hna hi Al-Shabah phu chung tel hlun pakhat a simi Sheikh Abdulkadir Mumin timi pa nih a hruai hnami an si. A luan ciami kum 2015 October thla ah khan Al-Shabah timi phu chungin a rak chuak i IS hruai tu Abu Bakr Al-Baghdadi sin ah bia kamnak a rak tuah.

Dhoqob hi Somalia ram IS rlahraang hruai tu Mumin nih a orhlei kut bantuk bak in a zumhmi le aa bochan tak tak mi si i IS phu nih an thlahmi video chungah aa tel peng vemi zong si fawn. An hruai tu Mumin zong hi a luan ciami kum 2017 November thla lio i vanlawng in an rak kah nain aa thuhnak Bari timi hmun in a rak luat.

A tu bantuk in an hruai tu minung biapi tak tak mi pakhat kan thah khawh hi an phu ning piin kan thah khawh hna nak ding ca le kan hrawh khawh hna nak ding caah santlaihnak a chuah tertu thil pakhat cu a si ve ko tiah security minister of Puntland a simi Abdisamad Mohamed Gallan nih cun a chim chap.

 

Releated Post