A Tlangval Tthing Pa Nupi Tthitnak Puai Ah Monu Thuam He A Cian Chih

Duhnak kan timi ah hin pa nak in nu pawl hi an ngamh rak sang deuh khun ko rua, aa duh bakmi nungak le tlangval an vun i tthen tik ah caan zei hmanh a rauh hlaan ah khin pa pawl cu nungak thar le nupi neih hna kan i fawih ngai ko nain nu pawl tu cu an rak si ve lem rua lo, kum caan sau pi tiang zong an tlangval te philh an i harh ngai tawn.

Tuluk ram khua pakhat ah nungak nu pakhat nih cun a tlangval tthing pa cu zei ti hmanh in a philh khawh bak lo caah mah a tlangval tthing pa nupi tthit puai bak ah ho hmanh zong nih an sawm lo nain monu thuam hruk in a va cian chih ve ko. Mah thil a cangmi hi a hmu tu hna zong an khuaruahhar tuk i thin hun ding le nichuah ding zong an i lak lawh dih ve.

A tlangval tthing pa nupi tthitnak puai ah monu thuam he a rak ra vemi nu nih hin ning zahnak, mah le mah i uahnak te hna zong zei hmanh a ruat kho hrim ti bak lo. Mah thil a cangmi cu a video bak in online media cung a hung phanh tik ah mah video a hmu tu cheukhat hna nih cun mah nu cu an zaangfaak ngai ve ko nain cheukhat ve hna nih cun an soisel ngai ve.

Tthitumnak puai ah nuam tak le ningzak pah nawn tein caan a hmang cuah mah lio tu monu le mopa hna nih pakhat le pakhat dawtnak in hnamh an vun i timh bak ah khin mi zei hmanh nih an ruah lomi mah thil cu a hung cang ko. Nu pakhat cu monu thuam bak hruk buin mah tthitumnak puai ah cun a rak phan ve ko i mopa hmai ah cun a khuk aa bilh hnu ah ngaihthiamnak bak a hal colh ko.

“Zei thil paoh kha kei mah thiam lo le palhnak lawng te bak si ko, a mah belte caanttha hi voikhat te tal cu rak ka pe hraam rih ko law ka sin ah hin rak kir tthan ko” tiah mah nu nih cun mopa cu a nawl chih. Mah ti bia a chim hnu ah mopa cu a baan bak in a tlaih chih tthan hoi i “kei mah sin ah rak kir tthan ko” tiah a ka in bia a chim thluahmah rih fawn.

Mopa zong nih cun mah bantuk thil hi a chuak lai tmi a ruah bak lo caah zei ti um ding bak a hngalh ve lo lio pi ah khan a mah he tthitumnak puai a tuah cuahmah mi a nungak nu zong nih a tlaihmi a kut cu thlah in a ttum taak diam. Mah thil hi a donghnak ah zei tin dah khua an run sak timi cu a ho hmanh nih an thei kho lo nain mah nih ei khawh lomi sa thetse a phulh tu nu cu an soisel tak tak ve.

Video zohnak: https://youtu.be/xw1phmcjQiE?t=9

 

Releated Post