Titoih Puai A Kalmi A Fanu Cu Thilak Bak In A Velh

Kawl titoih puai hi an mah kawl miphun hna caah cun a sunglawi tukmi kumthar a si ko nain kapkhat lei ah cun thihnak a chuahter tu puai pakhat a rak si ve bak ko, ka hnu kum 2018 titoih puai chungah khan a thimi minung an rak tlawm bal ti lo i tukum 2019 ah hin titoih puai aa thoknak hi tuni in nithum chung te lawng a si rih ko nain sizung phanmi le a thimi an tlawm ti lo.

Nizan April ni 15 ah khan Okdwin myone Thayatchin khua ah a ummi Ma Aye Aye Khine timi kum 15 nungak note cu a hawi le hna he titoih puai tuahnak ah a kal. A hawi le hna he mah ti i titoih puai tuahnak ah a kalmi nu te cu hringtu a pa bak nih na kal hri hrim tiin a velh ruangah a pa velhnak ruangah mah hngal lo in a um.

A fanu mah hngal lo in a um tik ah a rannak in Okdwin sizung ah an tlik pi colh ko nain a nunnak an chanh kho ti lo caah Ma Aye Aye Khine ruak cu cu sizung mithi ruak chiahnak khaan chungah an tthial. Hringtu nu le pa paoh nih cun kan fa le hna hi ttha hna seh ti cu kan duh cio ko lai nain hrin ciami fa le hna cungah faak tuk in kut thlaak te hna hi a rak ttha hrim lo.

 

Kan mah Laimi chung zongin hringtu nu le pa hna nih hrin ciami fa le hna cungah a herh huaha lo le an sual tuk lem lo zongah faak tuk in kut thlaak a hmangmi kan um. A ngai ngai ti ah cun Ma Aye Aye Khine nih hin a pa min chiatnak ding in sualnak ngan pi zong a tuah lem lo i an miphun kumthar ni ah a hawi le hna he titoih puai an va kal vemi te khi si ko caah mah tluk faak tiang in velh ding zong a herh bak lomi si.

 

Releated Post